Um ASÍ-UNG

Stjórn ASÍ-UNG
Stjórn ASÍ-UNG er skipuð ungu félagsfólki úr aðildarfélögum Alþýðusambands Íslands víðs vegar af landinu. Hlutverk stjórnarinnar er að leiða starf samtakanna á milli þinga, móta stefnu í málefnum ungs launafólks og koma sjónarmiðum yngri kynslóðarinnar á framfæri innan verkalýðshreyfingarinnar og í samfélagsumræðunni.
Stjórnin vinnur að hagsmunamálum ungs fólks á vinnumarkaði, stendur fyrir fræðslu, fundum og viðburðum og hvetur ungt fólk til þátttöku í starfi verkalýðsfélaganna. Einnig hefur hún það hlutverk að efla samstarf milli ungliðahópa innan aðildarfélaga ASÍ og skapa vettvang fyrir nýjar hugmyndir og framtíðarleiðtoga verkalýðshreyfingarinnar.
Á þingi ASÍ-UNG eru kjörnir fulltrúar í stjórn sem fara með umboð ungs launafólks innan ASÍ. Með starfi sínu stuðlar stjórnin að því að rödd ungs fólks heyrist skýrt í stefnumótun verkalýðshreyfingarinnar og að hún taki mið af þeim áskorunum og tækifærum sem blasa við nýjum kynslóðum á íslenskum vinnumarkaði.
Í stjórninni sitja 9 aðalmenn og 3 varamenn
Saga ASÍ-UNG
ASÍ-UNG var formlega stofnað á stofnþingi þann 27. maí 2011 að frumkvæði Alþýðusambands Íslands (ASÍ). Ársfundur ASÍ árið 2010 hafði ákveðið að skapa sérstakan vettvang fyrir ungt launafólk á aldrinum 18-35 ára innan aðildarfélaga sambandsins. Í aðdraganda stofnunarinnar ferðaðist undirbúningshópur um landið og fundaði með ungu fólki úr verkalýðshreyfingunni til að móta hlutverk, skipulag og framtíðarsýn hreyfingarinnar.
Markmið ASÍ-UNG var frá upphafi að efla þátttöku ungs fólks í verkalýðshreyfingunni, skapa vettvang fyrir skoðanaskipti og fræðslu, og tryggja að sjónarmið yngri kynslóðarinnar fengju aukið vægi í stefnumótun ASÍ. Á stofnþinginu voru samþykkt fyrstu lög og starfsreglur samtakanna og lagður grunnur að öflugu ungliðastarfi innan íslenskrar verkalýðshreyfingar.
Frá stofnun hefur ASÍ-UNG verið rödd ungs launafólks innan ASÍ og unnið að hagsmunamálum ungs fólks á vinnumarkaði, auk þess að styrkja tengsl og þátttöku nýrrar kynslóðar í starfi verkalýðsfélaganna.
ASÍ-UNG eru samtök ungs fólks innan verkalýðshreyfingarinnar sem sér til þess að hagsmunamál ungra Íslendinga á vinnumarkaði séu ávallt á dagskrá Alþýðusambandsins.
Af hverju ASÍ-UNG?
Félagsmenn aðildarfélaga ASÍ eru tæplega 140 þúsund. Nær helmingur þess hóps er á aldrinum 18-35 ára en á þeim aldri er fólk að stíga sín fyrstu skref á vinnumarkaðnum, öðlast starfsreynslu, stofna fjölskyldur og kaupa íbúðarhúsnæði svo eitthvað sé nefnt.
Hlutverk ASÍ-UNG
Að vera til staðar sem samstarfsvettvangur, álitsgjafi og umsagnaraðili um öll mál sem tengjast ungu fólki innan verkalýðshreyfingingarinnar.
Að standa vörð um hagsmuni ungs launafólks gagnvart stjórnvöldum og öðrum samtökum. ASÍ Ung fræðir og hvetur ungt fólk til þátttöku og áhrifa innan verkalýðshreyfingingarinnar með því að styðja við fræðslu og skapa vettvang fyrir ungt fólk til að kynnast og vinna saman innbyrðis, þvert á félög.
Í starfi ASÍ-UNG felst meðal annars að fylgjast með framþróun á vinnumarkaðnum, taka þátt í kjarasamningaviðræðum og vera í samstarfi við systursamtök í öðrum Norðurlandaþjóðum. Samtökin leggja áherslu á fræðslu, samstarf og að gefa ungum launþegum tækifæri til að hafa áhrif á þær ákvarðanir sem varða líf þeirra og framtíð.
Með þátttöku í ASÍ-UNG færðu aðgang að ráðgjöf um réttindi þín á vinnumarkaðnum, fræðsluefni um kjarasamninga og tækifæri til að tengjast öðrum ungum launþegum um land allt. Við trúum því að sterk samtök séu forsenda þess að ungt fólk geti byggt sér upp gott líf á Íslandi.