Fræðsla

Vinnumarkaðurinn

Vinnumarkaðurinn er sá vettvangur þar sem launafólk og atvinnurekendur mætast. Þar selur starfsfólk vinnu sína og þekkingu gegn launum og atvinnurekendur ráða starfsfólk til að sinna þeim verkefnum sem fyrirtæki og stofnanir þurfa á að halda.

Vinnumarkaðurinn er sá vettvangur þar sem launafólk og atvinnurekendur mætast. Þar selur starfsfólk vinnu sína og þekkingu gegn launum og atvinnurekendur ráða starfsfólk til að sinna þeim verkefnum sem fyrirtæki og stofnanir þurfa á að halda. Góð samskipti og skýrar reglur á vinnumarkaði eru grundvöllur þess að bæði launafólk og atvinnurekendur geti notið stöðugleika og öryggis.

Á íslenskum vinnumarkaði gegna stéttarfélög og kjarasamningar mikilvægu hlutverki. Stéttarfélög semja við atvinnurekendur um laun og starfskjör fyrir hönd félagsfólks og tryggja þannig lágmarksréttindi varðandi meðal annars laun, vinnutíma, orlof, veikindarétt og uppsagnarfrest. Þessi réttindi gilda fyrir alla launþega sem starfa innan viðkomandi starfsgreina.

Vinnumarkaðurinn er sífellt að þróast og takast á við nýjar áskoranir. Tæknibreytingar, sjálfvirknivæðing, breyttar væntingar um jafnvægi milli vinnu og einkalífs og aukin áhersla á menntun og símenntun hafa mikil áhrif á störf framtíðarinnar. Þess vegna er mikilvægt að ungt fólk þekki réttindi sín, taki þátt í mótun vinnumarkaðarins og láti rödd sína heyrast í gegnum stéttarfélög og verkalýðshreyfinguna.

ASÍ-UNG vinnur að því að efla þekkingu ungs fólks á vinnumarkaðinum, stuðla að virkri þátttöku þess í verkalýðshreyfingunni og tryggja að hagsmunir ungs launafólks séu ávallt hafðir að leiðarljósi við þróun íslensks vinnumarkaðar.